Célula parafolicular
As células parafoliculares son células que se encontran na glándula tiroide e que producen e segregan a hormona calcitonina [1]. Tamén se chaman células C, células claras ou células ultimobranquiais. Acompañan no tiroide ás células foliculares tiroides, pero son menos numerosas ca elas e están situadas tanto no epitelio folicular coma, principalmente, nos espazos interfoliculares, pero sempre sempre preto da base do epitelio e lonxe do lume folicular, aínda que dentro da membrana basal que rodea o folículo. Coñécense desde o século XIX (Baker, 1877) pero non se soubo a súa función ata o século XX.
Son células grandes e de tinguidura clara comparadas coas células foliculares ou o coloide do tiroide nas preparacións ordinarias, pero poden tinguirse selectivamente con nitrato de prata. Poden distinguirse citoquímicamente das células foliculares porque expresan o encima alfa-glicerofosfato deshidroxenase mitocondrial. Presentan unha serie de gránulos esféricos limitados por membrana secretorios de 0,1 a 0,4 microns que conteñen calcitonina e que se poden tinguir con azul de anilina.[2] A calcitonina é unha hormona que fai diminuír a concentración de calcio no sangue.[3]
Nos teleósteos e aves ocupan unha estrutura fóra da glándula tiroide denominada corpo ultimobranquial. Nicole LeDouarin descubriu por medio dunha serie de experimentos realizados no paspallás que estas células durante o desenvolvemento embrionario migraban desde a crista neural.[4]
Embrioloxicamente, están asociadas nos humanos aos corpos ultimobranquiais, que á súa vez derivan da cuarta (ou quinta) bolsa farínxea. As células parafoliculares derivan das células da crista neural e quedan incluídas no tiroide.
Cando as células parafoliculares se volven cancerosas, orixinan carcinoma medular de tiroide.[5]
Algunhas poboacións de células parafoliculares, debido á súa orixe na crista neural, son utilizadas como modelo para estudar as neuronas serotoninérxicas.[6]
Notas
[editar | editar a fonte]- ↑ Encyclopaedia Britannica Parafollicular cell
- ↑ D. W. Fawcett. Tratado de Histología. Editorial Interamericana-Mc. Graw Hill. 11ª edición. Páxinas 510-511. ISBN 84-7605-361-4
- ↑ Zabel M. Regulation of calcitonin secretion by thyroid parafollicular cells in vitro. Folia Histochem Cytobiol. 1995;33(3):193-6. PMID 8612873 [1]
- ↑ Nicole Le Douarin,Chaya Kalcheim. The Neural Crest.Google books
- ↑ J. B. Hazard. The C cells (parafollicular cells) of the thyroid gland and medullary thyroid carcinoma. A review.Am J Pathol. 1977 July; 88(1): 213–250. PMCID: PMC2032150. [2]
- ↑ Russo AF, Clark MS, Durham PL. Thyroid parafollicular cells. An accessible model for the study of serotonergic neurons. Mol Neurobiol. 1996 Dec;13(3):257-76. PMID 8989773. [3]
Véxase tamén
[editar | editar a fonte]Bibliografía
[editar | editar a fonte]- Baber EC: Contributions to the minute anatomy of the thyroid gland of the dog. Phil Trans R Soc 166 (1876) 557-568 (full text)
Outros artigos
[editar | editar a fonte]Ligazóns externas
[editar | editar a fonte]- OklahomaHistology - 42_04 Imaxe
- BUHistology - 14302loa Imaxe
- KansasHistology endo /endo10 ImaxeArquivado 05 de febreiro de 2012 en Wayback Machine.
- AnatomyAtlasesMicroscopic 15 287 Imaxe
| Control de autoridades |
|
|---|
