Nen@s da Revolta
 | Atención: Este artigo ou sección semella conter investigacións orixinais. |
| Nen@s da Revolta | |
|---|---|
| Orixe | Vigo, Pontevedra, Galiza  |
| Período | 1993 - 2001 |
| Xénero(s) | Mestizaxe, Raggamuffin, Ska, hip hop, Hardcore |
| Selo(s) discográfico(s) | Sons de Luita, Boa Music |
| Membros | Omar Alawi, Óscar Horta, Gonzalo Muinhos, Serxio Crespo, Xoan Rúa, Noelia dos Santos e Tamara Martínez |
| Na rede | |
  | |
Nen@s da Revolta (habitualmente pronunciado Nenas da Revolta), foron un grupo galego formado a comezos da década dos noventa na cidade de Vigo no contorno do Centro Social Ocupado Ruela. Nos seus comezos, con tres membros, o grupo seguiu un estilo vencellado ao hardcore, porén tras un parón de tres anos e coa incorporación de novos membros experimentaron unha evolución cara á música de mestizaxe, abríndose a múltiples influencias dende os sons latinos e caribeños á música popular galega ou o hip hop.
En 1998 publicaron o seu primeiro álbum Raggaliza dissidente + A Revolta d@s Nen@s. Xunto a nove temas marcados polas influencias caribeñas, aparecen outros seis da primeira etapa da banda. O traballo editouse baixo o selo Sons de Luita. Seguiuno As vozes roubadas, no ano 2000 baixo o selo Boa Music, cunha produción máis profesional. Ese mesmo ano un dos temas dese álbum ("Rebeliom na granja") foi escollido para o recompilatorio Radical Mestizo Dos Punto Mil, do selo Revelde Discos, xunto con outros artistas como Fermin Muguruza, Hechos contra el decoro, Manu Chao, Orichas ou Os Diplomáticos de Monte-Alto.
As letras dos dous álbums teñen un carácter político, tratando temas como a situación de Galiza baixo os gobernos de Manuel Fraga, a situación das persoas presas, a liberdade sexual, a liberación animal, ou a loita feminista. Ademais, o grupo presentou todos os seus títulos e letras en galego reintegrado.
O grupo disolveuse no ano 2001, aínda que o volveron a reunirse sobre un escenario en Vigo o 14 de marzo do 2008 na celebración do vinte aniversario de Radio Piratona, xunto a Tiro na Testa e a La Vaga Banda.
Algúns dos seus membros participaron en proxectos como A Matraca Perversa ou Galegoz.
Discografía
[editar | editar a fonte]- Raggaliza dissidente + A Revolta d@s Nen@s (Sons de Luita, 1998). Reúne dous traballos nun único disco.
- As vozes roubadas (Boa Music, 2000).
Presenza en recompilatorios
[editar | editar a fonte]- Radical Mestizo Dos Punto Mil (Revelde Discos, 2000)
