Manu Chao

Manu Chao

Biografía
Nacemento	21 de xuño de 1961 (63 anos) París, Francia
Residencia	Barcelona
Actividade
Ocupación	músico, guitarrista, compositor, cantante, artista urbano
Período de actividade	1980 -
Xénero artístico	Reggae, ska, world music e música de América Latina
Influencias	Chuck Berry, Camarón de la Isla, Bob Marley e Georges Brassens
Instrumento	Guitarra e voz
Selo discográfico	Virgin Records
Familia
Pai	Ramón Chao
Irmáns	Antoine Chao
Premios
(2007)  Premio Grammy Latino á mellor canción alternativa (2002)  Victory of the album of traditional musics or musics of the world (en) , premiado polo traballo Próxima Estación: Esperanza (1999)  Victory of the album of traditional musics or musics of the world (en) , premiado polo traballo Clandestino
Descrito pola fonte	Obálky knih,
Páxina web	manuchao.net

Manu Chao, nado como José-Manuel Thomas Arthur Chao o 21 de xuño de 1961 é un músico e compositor francés, de familia galega. É coñecido por cantar en varias linguas como francés, español, inglés, italiano, árabe, galego e portugués, e ocasionalmente noutras linguas. Chao comezou a súa carreira musical en París, tocando con grupos como Hot Pants e Los Carayos, que combinaba gran variedade de linguas e estilos musicais. Xunto con amigos e co seu irmán Antoine Chao, fundou a banda Mano Negra en 1987, acadando un éxito considerable, particularmente en Europa. Comezou a súa carreira en solitario en 1995, e dende entón fai xiras regularmente coa súa banda de directo, Radio Bemba.

Traxectoria

Manu Chao é fillo do xornalista vilalbés Ramón Chao e de nai vasca de Bilbao. Os seus pais emigraron a Francia durante a ditadura de Francisco Franco. Manu e os seus irmáns creceron en Sèvres, ó oeste de París.

Ós 14 anos tivo o seu primeiro grupo, chamado Joint de Culasse, co seu irmán Tonio do Borneo, e o seu curmán Santi Cassariego. Máis tarde chegaron os Hot Pants e Los Carayos, cos que se aproximaba xa moito á música festiva e a pachanga. Estes grupos chegaron a ser moi coñecidos en París dentro da música alternativa.

En 1987 Manu, o seu irmán e o seu curmán fundaron o grupo Mano Negra, que triunfou primeiro en Francia co sinxelo "Mala vida" e despois tiveron xiras por Suramérica. Tras unha longa tempada no grupo (de 1987 a 1994), comezou a súa carreira en solitario. Nos anos da gravación e publicación do seu primeiro álbum, "Clandestino", participou con bandas e artistas galegos como Os Diplomáticos de Monte Alto con Johnny Rotring (Xosé Manuel Pereiro) e Mercedes Peón, Os Papaqueixos, o regueifeiro Pinto d'Herbón, a pandeireteira Josefa de Bastabales, Siniestro Total, etc. en festivais xunto a Caravane des Quartiers, en Barcelona, Lyon e Santiago de Compostela ('A Feira das Mentiras'), tamén xunto a outros artistas de fóra de Galiza (Amparanoia, Dusminguets, Tonino Carotone, etc). Tamén participou en dúas cancións do Xabarín Club ("Oda ao futbolín" e "Toliño por vivir").

Chao canta en francés, español, catalán, árabe, portugués, inglés, galego e wolof, cambiando de idioma a miúdo na mesma canción. Aínda que é un dos artistas máis vendedores do mundo, é pouco coñecido nos países de fala inglesa.

A súa música ten moitas influencias: rock, chanson francesa, salsa, reggae, ska e raï alxeriano. Recibiu estas influencias de inmigrantes en Francia, das súas relacións ibéricas, dos seus percorridos en América con Mano Negra e vagando tras a disolución do grupo. Moitas das cancións de Chao son sobre o amor, a vida nos guetos e a inmigración, e levan a miúdo unha mensaxe de esquerda e libertario.

Estivo comprometido desde hai tempo co nacionalismo vasco, talvez debido ás súas orixes. Foi especialmente na época de Mano Negra cando participou en varias xiras musicais xunto ó conxunto vasco Negu Gorriak. Despois foron varias as colaboracións que realizou en diversas cancións xunto a Fermin Muguruza facendo xunto a el a xira Jai Alai Katumbi Express por Europa.

Por outra banda, solidarizouse coa causa zapatista e o EZLN e incluíu fragmentos dos discursos do Subcomandante Marcos nas súas cancións. Tamén se solidarizou coa causa dos okupas de Barcelona.

O seu estilo persoal influenciou a grupos como Amparanoia e outros moitos.

En 2004 publica o disco-libro Sibérie m'était contéee, en francés, con ilustracións do debuxante polaco Wozniak.

En setembro de 2007, editouse o CD A Radiolina, cuxos temas presentou ese verán cunha xira de concertos que incluíu un na cidade de Vigo.

O seu equipo favorito é o Atlas de Guadalaxara, (Xalisco, México). É por iso que adoita levar roupas roxinegras, xa que eses son as cores do equipo.

Discografía

Manu Chao nun concerto en (Xixón, Asturias)

• Clandestino (1998)
• Próxima Estación: Esperanza (2001)
• Radio Bemba Sound System (2002)
• Sibérie m'était contéee (2004)
• La Radiolina (3 de setembro de 2007)
• Viva Tu (2024)

Xiras

• Giramundo Américas (2000)
• Tómbola (2006)
• Tour Radio Bemba (Suramérica e Centroamérica) (2006)
• Tómbola Norte América (Canadá, os EEUU e Baixa California, 2007)

Libros

• Sibérie m'était contéee (2004).

Véxase tamén

Bibliografía

• Chao, Ramón. Mano Negra en Colombia. Un tren de hielo y fuego, 2001 (título orixinal: Un train de glace et de feu). Unha crónica da xira de Mano Negra en tren por Colombia, escrita polo pai de Manu e Tonio.
• Robecchi, Alessandro (2001). Manu Chao. Música e liberdade. Vigo: Edicións Xerais de Galicia. ISBN 84-8302-725-9.  (orixinal en italiano do ano 2000)

Ligazóns externas

• Páxina oficial de Manu Chao Arquivado 02 de marzo de 2001 en Wayback Machine.
• Páxina non oficial de Manu Chao México
• Extensa reportaxe sobre Manu Chao en La Factoría del Ritmo
• Manu Chao en AudioKat