Pyromania é o terceiro álbum de estudio da banda inglesa de rockDef Leppard, publicado o 20 de xaneiro de 1983[1] a través do selo Vertigo Records no Reino Unido e de Mercury Records nos Estados Unidos. Pyromania foi o primeiro álbum no que aparece o guitarrista Phil Collen, que substituíu ao membro fundador Pete Willis, e foi producido por Robert John "Mutt" Lange. O álbum afastouse das raíces heavy metal da banda cara a un son máis amigable coa radio, conseguindo o éxito entre o grande público. Pyromania chegou ao número 2 da lista Billboard 200,[2] ao número 4 da lista de álbums RPM canadense e ao número 18 da lista de álbums do Reino Unido.[3] Vendendo máis de dez millóns de copias nos Estados Unidos, foi certificado diamante pola RIAA.[4]