Rodrigo Beruete Alejandre
| Biografía | |
|---|---|
| Nacemento | c. 1902  Vilagarcía de Arousa, España |
| Morte | 16 de febreiro de 1937 (34/35 anos) Loenzo, España |
| Causa da morte | morte en combate, asfixia |
| Actividade | |
| Ocupación | sindicalista, xornalista, maquis |
| Membro de | |
 | |
Rodrigo Beruete Alejandre,[1] coñecido como Gitano, nado en Vilagarcía de Arousa cara a 1902 e finado no mesmo concello o 16 de febreiro de 1937, foi un sindicalista e guerrilleiro galego.
Traxectoria
[editar | editar a fonte]Xornaleiro. Pertencía á Federación Local da CNT de Vilagarcía de Arousa. Foi procesado na Audiencia provincial por atentado con Juan Caamaño Tobío en xullo de 1933, acusados de agresión a un axente de vixilancia cando entraron no café American bar de Vilagracía o 24 de xullo de 1932.[2]
Co golpe de Estado do 18 de xullo de 1936 fuxiu ao monte e organizou un grupo guerrilleiro no monte Xiabre con outros fuxidos: Ángel Buceta Loroño, Ramón Rodríguez Carregal, Francisco Baamonde García, Manuel Martínez Freire, José Torres Eiras, e Serafín Brea Otero, ao que se foron incorporando Urbano Tarrío Montero, Manuel Limeres Ordóñez, Juan Gil Quintela, Antonio Basilio Sayanes González, Pilar Fernández Seijo e Manuel Díaz Hermo. Foi reclamado en agosto polo xuíz militar de Vilagarcía mediante requisitoria xunto con Félix Fernández Prieto, acusados de secuestro.[3] Perseguidos pola Garda Civil, o exército, os carabineiros e as milicias de Falanxe e a Garda Cívica de Vilagarcía, o 13 de febreiro de 1937 cercan a casa de Pilar Fernández en Trabanca Badiña onde estaban refuxiados, pero lograron fuxir. Na persecución morreu Manuel Díaz Hermo e Ángel Buceta entregouse ao día seguinte. O 16 de febreiro foron cercados nunha casa de Loenzo, os franquistas prendéronlle lume ao edificio e morreron carbonizados Rodrigo Beruete, Pilar Fernández, Manuel Limeres e Antonio Sayanes. Os cadáveres foron trasladados ao cemiterio de Vilagarcía e soterrados nunha fosa común sen nome.[4]
Notas
[editar | editar a fonte]- ↑ Nalgunhas fontes o primeiro apelido aparece como Berruete
- ↑ El Pueblo Gallego, 7-7-1933, p. 10.
- ↑ El Pueblo Gallego, 23-8-1936, p. 9.
- ↑ A ciencia ao rescate da memoria dos 18 asasinados na foxa de Vilagarcía
Véxase tamén
[editar | editar a fonte]Bibliografía
[editar | editar a fonte]- Abuín Duro, Marcelino (2018). La primavera rota. Vilagarcía de Arousa, 1936-1941. Abegondo: Sociedad Bibliográfica de Galicia. pp. 294–302. ISBN 978-84-09-02453-7.
- Fajardo, Montse (2012). Matriarcas, mulleres en pé de vida. Vilagarcía de Arousa: autor-editor. ISBN 978-84-939599-3-7.
