The Piper at the Gates of Dawn é o álbum de estrea da banda inglesa de rock progresivoPink Floyd, e o único realizado baixo o liderado de Syd Barrett. O disco foi gravado dende febreiro a maio de 1967 coa produción do enxeñeiro dos Beatles Norman Smith, e foi publicado o 5 de agosto de 1967 a través do selo EMI Columbia no Reino Unido. Nos Estados Unidos foi editado por Tower Records no mes de outubro, coincidindo coa xira da banda por ese país No Reino Unido non se publicou ningún sinxelo do álbum, porén, nos Estados Unidos foi lanzado o tema "Flaming". A versión estadounidense do disco ten unha listaxe da cancións reordeada, e contén o sinxelo británico non aparecido no álbum "See Emily Play". Dúas das cancións, "Astronomy Domine" e "Interstellar Overdrive", foron fundamentais nos concertos desa época, mentres que outros temas só foron interpretados un feixe de veces.
Dende a súa publicación o álbum foi aclamado como un dos mellores discos de rock psicodélico dos anos 60. En 1973, The Piper at the Gates of Dawn foi editado conxuntamente co segundo álbum da banda, A Saucerful of Secrets, nun paquete chamado A Nice Pair para itroducir aos novos seareiros aos primeiros traballos do grupo tras o éxito de The Dark Side of the Moon. Edicións especiais limitadas foron lanzadas nos seus 30 e 40 aniversarios en 1997 e 2007, contendo o último deles cancións extra. No ano 2012 foi colocado no posto 347 da lista da Rolling Stone dos "500 mellores álbums de todos os tempos"[1].
