Yin-Yang

Símbolo que representa o Ying e o Yang. Reflicte a dualidade entrelazada de todas as cousas da natureza, un tema común no taoísmo que explica que en cada home se esconde unha muller, como unha conciencia feminina, e en cada muller, un home, como unha conciencia masculina.

O Taijitu (太极图), máis comunmente coñecido como Yin e Yang, é un símbolo chinés dun sistema de crenzas chamado taoísmo. Tamén está estilizado como Yinyang ou Yin-Yang. Representa a idea de que a natureza está formada por forzas e enerxía opostas pero complementarias. É unha representación gráfica das forzas opostas pero complementarias do Yin e o Yang.

Características e significado

• Deseño Básico: Consiste en dous "peixes" xiratorios, un de cor branca (Yang) e outro de cor negra (Yin). Cada un destes "peixes" contén un punto da cor oposta no seu interior. Ambos os dous lados conteñen a cor oposta dentro de si mesmos para representar a idea principal do dualismo. Algúns exemplos destes opostos equilibrados son: Luz e Escuridade, Masculino e Feminino, Expansión e Contracción, Arriba e Abaixo, Sol e Lúa e Movemento e Repouso.
• Interdependencia: O deseño mostra como o Yin e o Yang están interconectados e non poden existir o un sen o outro. A presenza do punto de cor oposta en cada metade subliña esta interdependencia e a idea de que cada forza contén a semente da súa contrapartida.
• Fluxo e cambio: O movemento circular do deseño reflicte a natureza cambiante do universo e a transición constante entre o Yin e o Yang. As forzas non son estáticas; en certos momentos e circunstancias, unha pode predominar sobre a outra, pero este estado é temporal e sempre suxeito a cambio.
• Taoísmo: O Taijitu é profundamente taoísta na súa orixe e significado. Reflicte a filosofía taoísta de equilibrio, harmonía e a interacción constante entre as forzas opostas do universo. Aínda que o Taijitu está máis asociado co taoísmo, tamén se atopa noutras tradicións e prácticas chinesas, como o confucianismo e a medicina tradicional chinesa.
• Segundo algúns, a ciencia tamén inclúe ese ideal de dualismo nalgunhas áreas, por exemplo o electromagnetismo: os imáns requiren polo norte e polo sur para que sexa funcional e se mova. En química, os protóns pódense representar por Yang e os electróns por Yin. O Nobel de Física Niels Bohr en 1947, levou un emblema cun taijitu en vermello e negro, co lema contraria sunt complementa ("os opostos son complementarios). O físico Fritjof Capra publicou o libro The Tao of Physics en 1975 que resumiu en que "a ciencia non precisa misticismo e o misticismo non precisa ciencia. Porén, o ser humano precisa ambas as dúas cousas".

Na cultura popular

O yin e o yang pódense ver á esquerda da bandeira de Mongolia. Outros países como o Tíbet, ou Estados-nación como Corea do Sur ou Singapur levan o Taijitu na bandeira ou outros símbolos oficiais.

A representación gráfica do concepto tornouse un elemento de mercadeo, e mesmo unha filosofía popular similar aos proverbios de que todo yin ten o seu yang (por exemplo, a comida é esencial para vivir, pero comer moito causa problemas de saúde e comer pouco causa fame).

Algúns exemplos en varios eidos:

• Arte e deseño: hai numerosos exemplos, tanto occidentais como orientais, do clásico Ma Yuan ao moderno Takashi Murakami que mestura a tradición con estilo pop.
• Cine e televisión: No filme Karate Kid, o mestre Miyagi explica o concepto de equilibrio usando a idea do Yin-Yang. Series animadas como Avatar: The Last Airbender fan referencia ao equilibrio Yin-Yang. O actor e artista marcial Bruce Lee falou con frecuencia da importancia do equilibrio, facendo referencia ao Yin-Yang.
• Videoxogos: No Mortal Kombat, o personaxe Raiden ten un deseño de Yin-Yang na súa vestimenta. En Tales of Symphonia, onde o equilibrio do mundo e a dualidade son temas centrais. o Taijitu é usado como símbolo recorrente.

Véxase tamén

Outros artigos

• Dualismo
• Historia da China
• I Ching
• Símbolos de paz

Ligazóns externas

• Significado de Yin Yang nun vídeo educativo chinés^{[Ligazón morta]} .
• Taijitu en profundidade