As doce probas de Astérix

As doce probas de Astérix
Ficha técnica
Título orixinal	Les Douze travaux d'Astérix
Director	René Goscinny Albert Uderzo Pierre Watrin
Produtor	Georges Dargaud
Guión	Pierre Tchernia René Goscinny Albert Uderzo
Música	Gérard Calvi
Estrea	20 de outubro de 1976 6 de abril de 2001 (TVG)
Duración	82 minutos
Orixe	Francia Bélxica
Xénero	Animación
Filme anterior	Astérix e Cleopatra
Filme seguinte	Astérix e a sorpresa do César
Na rede
http://www.asterix.com/the-a-to-z-of-asterix/animated-films/twelve-tasks.html e https://asterix.com/asterix-au-cinema/les-dessins-animes/les-douze-travaux-dasterix/

As doce probas de Astérix (en francés: Les Douze travaux d'Astérix) é un filme franco-belga de animación baseado na serie de banda deseñada de Astérix. René Goscinny e Albert Uderzo, os creadores da serie, escribiron a historia e dirixiron o filme eles mesmos, contando coa codirección de Pierre Watrin e co guionista Pierre Tchernia, un amigo de Goscinny e Uderzo. O filme foi dirixido, producido e animado no estudio de animación de Goscinny e Uderzo, Studios Idéfix.

É o único filme de Astérix (animado ou de acción) que está baseado nun guión orixinal no canto das historias de banda deseñada. Posteriormente, foi adaptado nun tomo da colección e nunha serie de doce libros para nenos lectores.

Estreouse en galego na TVG o 6 de abril de 2001. Foi editado en DVD pola TVG coa dobraxe en galego.

Sinopse

Como en todos os álbums de Astérix, na Galia, ocupada polos romanos, un pequeno poboado galo resiste de forma vitoriosa os insistentes ataques dos invasores grazas á poción máxica do druída Panorámix. Cando o enésimo ataque é doadamente rexeitado polos aldeáns, empeza a espallarse polas tropas romanas a idea de que, se cadra, eses galos non son seres humanos, senón deuses e, polo tanto, non poden ser vencidos.

Esa historia remata por chegar ao mesmo Xulio César que, escéptico, decide probar a divindade dos galos. Para iso, preséntase na aldea coa seguinte proposta: Do mesmo xeito que Hércules tivo que superar doce probas para ser aceptado no Olimpo, os galos deben superar outras 12 probas (Non as mesmas pois, en palabras do propio César "Esas xa están pasadas de moda"). De seren superadas, os galos serían considerados deuses e Roma pasaría a ser súa, mais no caso de fracasar tan so nunha, os galos sumeteríanse sen resistentencia ao Imperio.

O xefe da aldea, confiado pese ás protestas de Panorámix, acepta o reto e elixe a Astérix, por ser o máis listo, e Obélix, por ser o máis forte, para representar aos galos nestas probas. Os dous heroes, guiados polo supervisor romano Caius Pupus, terán que:

1. Vencer nunha carreira a Merinos un campión dos xogos de Olimpia.
2. Lanzar a xavalina máis lonxe que Kermes o persa, o mellor "lanzador de arma" do mundo.
3. Vencer nun combate a Cylindric o Xermano.
4. Enfrontarse ás sacerdotisas da "Illa do pracer".
5. Sosterlle a mirada a Iris, o mago exípceo.
6. Comer absolutamente todo o que prepare Mannekenpix, o cociñeiro dos titáns.
7. Penetrar no Antro da Besta.
8. Conseguir o impreso A-38 na Casa da Tolemia.
9. Cruzar un abismo con crocodilos do Nilo no fondo a través un cable invisible.
10. Agabear a montaña máis alta e responder sen errar ao enigma do Venerable do Cume.
11. Pasar a noite na Chaira dos Mortos.
12. Gañar nos xogos do circo en Roma

Unha vez máis, o destino da aldea queda nas súas mans nun todo ou nada.

Véxase tamén

Ligazóns externas

• As doce probas de Astérix na IMDb (en inglés).