Igrexa de Santa María do Azougue

Igrexa de Santa María do Azougue
Fachada principal.
Datos xerais
País	España
Rexión	Galicia
Tipo	Igrexa parroquial
Advocación	Santa María
Localización	Betanzos
Coordenadas	43°16′55″N 8°12′40″O
Catalogación	Ben de Interese Cultural (1944)
Culto
Culto	Igrexa católica
Diocese	Santiago de Compostela
Arquitectura
Construción	1350-1450
Estilo	gótico
Igrexa de Santa María do Azougue Localización da igrexa no mapa de Galicia
[ editar datos en Wikidata ]

A igrexa de Santa María do Azougue atópase situada na cidade de Betanzos, na provincia da Coruña. Está declarada Monumento Nacional, e Ben de Interese Cultural por Decreto de 1944.

Historia

Foi construída entre a segunda metade do século XIV e a primeira do XV sobre outro templo máis antigo de época románica. A obra promovérana os condes de Andrade: Fernán Peres de Andrade o Boo e o seu sucesor Fernán Pérez de Andrade o Mozo.

Descrición

Igrexa de estilo gótico, presenta unha planta basilical de tres naves con catro tramos, sen abovedar e desembocando todas elas nunha tripla ábsida; a central máis ancha que as laterais. A capela maior debuxa unha traza poligonal, heptagonal, mentres que as capelas absidais teñen planta cadrada. Estas tres dependencias son as únicas que se cobren con bóveda de aresta.

O coro levántase aos pés do templo. Da ornamentación interior destaca o retablo da capela maior. No século XV instalouse nese lugar un retablo hispano-flamengo, que foi substituído na súa armazón por outro novo en 1748, no cal se colocaron as tallas góticas do orixinal, con representación da vida de Cristo en madeira dourada e policromada. No ano 1981 foron roubadas tódalas súas tallas, aínda que posteriormente se foron recuperando. Iluminan o interior do templo catro fiestras con parteluz, xunto a outras máis modernas a capela maior, e unha sinxela, coetánea á igrexa, a capela absidal do Evanxeo.

No ano 2022 lévanse a cabo na igrexa de Santa María labores de restauración patrocinados pola Xunta de Galicia. Durante a restauración e co traslado do retablo de San Pedro, queda ao descuberto un arcosolio decorado con volumes en pedra e policromías, e descóbrese que acolle un enterramento decorado cun panel de pintura mural na zona superior. O conxunto ata agora descoñecido na igrexa de Santa María, constitúe o único arcosolio funerario que conserva policromías e pinturas murais na vila de Betanzos.

No seu exterior sobresaen as portadas. Na fachada principal encóntrase o tema da Epifanía, e sobre fornelos preséntanse as imaxes da Anunciación. A portada norte reproduce o tema do Xuízo Final, no que San Miguel pesa nunha balanza a alma dun xusto en actitude orante, mentres un morto recibe dun monstro un chorro de líquido fervente. A porta de entrada está cuberta por un arco de medio punto, decorado con arquiños a xeito de palmeiras invertidas e nas arquivoltas varias ordes de motivos vexetais e xeométricos. No tímpano dúas escenas da Adoración dos Reis e a Anunciación. Enriba loce un amplo rosetón.

Galería de imaxes

Artigo principal: Galería de imaxes da igrexa de Santa María do Azougue.

• 
  Fachada principal
• 
  Porta de acceso
• 
• 
• 
• 
• 
• 
  Reprodución do Xuízo Final nunha das fachadas da igrexa.
• 
• 
• 
  Porta lateral.
• 
  Tímpano da porta principal.
• 
  Detalle do tímpano.
• 
  Capiteis.
• 
  Vista da ábsida.
• 
  Vista da ábsida e xardíns anexos.
• 
  Nave principal.
• 
  Crucifixo e pía bautismal.
• 
  Vista de elementos interiores.
• 
  Interior do templo.

Véxase tamén

Ligazóns externas

• www.betanzos.net (en castelán).
• Igrexa de Santa María do Azougue na páxina web colaborativa Patrimonio Galego.
• Ficha Arquivado 11 de setembro de 2016 en Wayback Machine. en Turgalicia.