Requeixo, Chantada

Para outras páxinas con títulos homónimos véxase: Requeixo.

Requeixo
Ábsida da igrexa de Santiago de Requeixo.
Concello	Chantada
Provincia	Lugo
Coordenadas	42°36′47″N 7°52′09″O
Área	10,04 km²
Poboación	128 hab. (2020)
Densidade	12,75 hab./km²
Entidades de poboación	17
[ editar datos en Wikidata ]

Santiago de Requeixo é unha parroquia que se localiza no concello de Chantada. No ano 2020 tiña unha poboación de 128 habitantes (60 homes e 68 mulleres) segundo os datos do Instituto Nacional de Estadística. Supón un descenso respecto ao ano 2011, cando contaba con 166 veciños, e 2004, cando tiña 192.

Toponimia

O nome da parroquia é un orónimo ben descritivo da súa xeografía, pois se atopa nas abas orientais da serra do Faro que descenden á conca do río Miño.

Xeografía

A parroquia de Requeixo, con 10,04 km², é a terceira en extensión despois das da Laxe e de Nogueira. Está a 14 km da vila de Chantada, na parte baixa do monte Faro, que acada 1187 metros. A zona habitada da parroquia sitúase a unha altitude de entre 600 e 700 metros.

Dispón de abundantes mananciais e regatos. A montaña do Faro e as súas ladeiras están poboadas de árbores que supoñen unha fonte de riqueza para a zona. Destacan grandes exemplares de castiñeiros. Dende a montaña antes citada pódese gozar de amplas vistas panorámicas. En días claros chega a se albiscar a central térmica de Meirama, na comarca coruñesa de Ordes. Así mesmo esta montaña acubilla distintas especies de caza. Ultimamente pódense encontrar exemplares de caza maior, como o gamo ou o xabaril, entre outros.

Ermida de Nosa Señora do Faro en Chantada.

Historia

No monte Faro atópase a ermida dedicada á Nosa Señora do Faro, onde se celebran romarías os días 15 de agosto, e 7, 8 e 9 de setembro, xa descritas polo trobador Xoán de Requeixo nas súas cantigas de amigo no século XIII. O día 7 de setembro sóbese a Virxe en romaría deica a ermida, que dista uns 4 quilómetros da igrexa parroquial de Requeixo, mentres que o día 9 vólvese baixar.

A parroquia de Requeixo no momento de máximo esplendor chegou a ter preto de 1.000 habitantes. O val de Requeixo é moi rico en gandaría polos seus amplos pasteiros.

Economía

Requeixo dispón de medianos saltos de auga onde se produce enerxía eléctrica e que outrora servían para mover as aceas. En tempos recentes descubríronse minas moi abundantes en estaño, as cales atraeron moitos foráneos para a súa explotación.

Tradicionalmente moitas mulleres de Requeixo traballaron como tecelás, entre as que se lembran especialmente as irmás Elvira e Evangelina. Os seus traballos eran coñecidos e apreciados en todo o país e mesmo tamén noutras rexións, como en Madrid. Tamén destacaron artesáns de ebanistaría.

Patrimonio

Entre o seu patrimonio monumental, salienta a igrexa románica de Santiago de Requeixo, do século XII, situada no lugar de Fontela. Nela destaca o tímpano embutido nunha parede lateral, que pertenceu á portada románica actualmente desaparecida. Ten un repertorio variado de canzorros de gran calidade, e no interior, interesantes pinturas murais do século XVI.

Véxase tamén

Outros artigos

• Lugares de Chantada