Anxo González Guerra

Anxo González Guerra
	; (2017)
Biografía
Nacemento	28 de abril de 1955 (69 anos); Trasar de Carballo, España
Educación	Universidade de Santiago de Compostela
Actividade
Ocupación	escritor, catedrático, wikimedista
Obra
	Obras destacables (2016) Contos do avó Anxo para o neno Aldán ;
Familia
Cónxuxe	Vitoria Ogando Valcárcel
Fillos	Paulo González Ogando
Premios
	(2023) Billó de Ouro; (2018) Premio Xoán Manuel Pintos ;
Páxina web	anxo.info

Anxo González Guerra, nado en Trasar de Carballo (Cartelos, Carballedo) o 28 de abril de 1955, é un profesor galego.

Traxectoria

Estudou no Seminario de Lugo e formou parte da primeira promoción de Filoloxía Galego-Portuguesa na Universidade de Santiago de Compostela. Desde 1980 deu clase no IES Sánchez Cantón de Pontevedra, converténdose en catedrático en 1992. Colaborou coa Universidade de Vigo como docente na preparación do profesorado no CAP e no Mestrado de Secundaria.

Xubilouse da docencia en abril de 2015.^[1]

Anxo González Guerra con parte dos integrantes da 1ª promoción de Galego-Portugués da USC: Manuel Castelao, Luís Cambeiro Cives, Vitoria Ogando, Manuel Ferreiro Fernández, Tareixa Roca, María dos Anxos González Refoxo, Ramona Giráldez, María Xosé Queizán, María do Carme García Pereiro, Luís Gayoso Baqueiro, Carme Vázquez Castro, Manuel Figueiras Fernández, Francisco Salinas Portugal e César Morán.

Colaborou na redacción do Dicionario da Lingua Galega-Isaac Alonso Estravís (Ed. Alhena, 1986). Desde 2005 coordina canda a súa muller, Vitoria Ogando Valcárcel, a páxina web ogalego.eu. Dende 2015 colabora de forma activa na Galipedia.^[2]

Forma parte da galería de personaxes ilustres de Carballedo.^[3]

Dende 2021 a 2023 colaborou co programa Luar da Televisión de Galicia facendo o papel de profesor de lingua galega.^[4]

Publicacións

O idioma galego na poesía de Manuel Antonio. Ediciós do Castro, 1981, Sada. ISBN 84-7492-076-0.
Manuel Antonio. Nós, 1982, A Coruña (con Xosé Ramón Pena). ISBN 84-7540-004-3.
Exercicios de lingua. Ed. Vía Láctea, 1987, A Coruña (con Vitoria Ogando Valcárcel). ISBN 84-86531-36-1.
"Fraseoloxía e paremioloxía de Pilar Guerra (Trasar, Carballedo, Lugo)", en Cadernos de Fraseoloxía Galega 12-2010. ISSN 1698-7861.
Contos do avó Anxo para o neto Aldán. Autoedición, 2016. ISBN 978-84-16121-51-9.

Premios

2004: Premio á innovación educativa sobre os temas transversais da Xunta de Galicia, polo traballo Mulleres libros e internet, con Mª Ángeles Costa Giráldez e Rosario Sánchez Gabriel-Sánchez.^[5]
2013: Premio para o uso das TIC como apoio á personalización da aprendizaxe en educación secundaria, dotado con dez mil euros. Concedeuse por unanimidade ao proxecto denominado m-TIC. Programando aplicaciones con APP INVENTOR, presentado por un equipo docente do IES Sánchez Cantón, de Pontevedra, constituído por dona M.ª Esperanza Gesteira Losada, dona M.ª Rosario Sánchez-Gabriel Sánchez, e don Anxo González Guerra. Ministerio de Educación, Cultura e Deporte.^[6]
2018: Premio Xoán Manuel Pintos do Concello de Pontevedra^[7] xunto con Vitoria Ogando.
2019: Finalista na Gala do Libro Galego por ogalego.eu con Vitoria Ogando.
2022: Premio Cidade de Pontevedra^[8] xunto con Vitoria Ogando.
2023: Billó de Ouro, concedido pola Asociación Cultural e Gastronómica Luso-Galaica e o concello de Carballedo.^[9]
2024: Tangaraño de Honra en Sobradelo.^[10]