Fillas de Breogán

Fillos de Breogán

Nome	A Coruña Fillas de Breogán
Alcume(s)	Fillas
Fundación	2010
Sede	A Coruña, Galicia
Estadio(s)	Cidade Deportiva da Torre de Hércules
Capacidade	1 500 espectadores
Liga(s)	Liga Ibérica Liga Galega de Fútbol Gaélico
Casa Fóra
Na rede
http://www.fillosdebreogan.com/

A Coruña Gaelic Athletic Association ou A Coruña GAA, máis coñecido como Fillas de Breogán é un equipo feminino de fútbol gaélico da cidade da Coruña. Igual que o equipo masculino, os Fillos de Breogán, o equipo foi fundado en 2010, sendo o primeiro equipo feminino de fútbol gaélico de Galiza e compite no Campionato Ibérico de Fútbol Gaélico e na Liga Galega de Fútbol Gaélico. Xoga os seus encontros no campo da Torre da cidade herculina.

En 2015 debutou no Campionato Paneuropeo disputado na Estrada, repetindo nas edicións de 2017 (Maastricht), 2019 (Viena), 2022 (A Coruña), 2023 (A Haia) e 2024 (Lión).

Ao longo da súa historia o equipo conseguiu numerosos títulos, salientando os tres títulos no Campionato Ibérico de Fútbol Gaélico (todos eles conseguidos de xeito consecutivo), ou os dous títulos na categoría "Intermediate" do Campionato Paneuropeo en 2019 e 2024, así como diversos títulos nas competicións organizadas pola Asociación Galega de Fútbol Gaélico. As Fillas de Breogán son o único equipo galego que se alzou co campionato ibérico, así como o único que conseguiu un título continental de fútbol gaélico.

Historia

En 2015 debutou no Campionato Paneuropeo que se celebrou na localidade galega da Estrada.

O 3 de xuño de 2017 o equipo revalidou o título ibérico ao gañar a fase final do Campionato Ibérico de Fútbol Gaélico que se disputou na Cidade Deportiva Municipal da Torre da Coruña, e na que todos os equipos participantes foron galegos, coa excepción das Madrid Harpettes. As coruñesas superaron a fase de grupos, o que lles deu o pase á final, na que se impuxeron ás Irmandinhas da Estrada.

O equipo das Fillas de Breogán coa copa do Torneo Paneuropeo en 2019.

En outubro de 2019 chegou o primeiro título continental do equipo logo de conquistar a Copa Intermediate do Campionato Paneuropeo que se celebrou en Viena (Austria) no marco dos Gaelic Games Europe. As Fillas contaron todos os seus partidos por vitorias, tanto na fase de grupos, na que se impuxeron aos equipos das Prague Hibernians, Vienna Gaels e Cumann Garszawa, como nas semifinais fronte ás Munich Colmcilles, e na final fronte a unhas das grandes favoritas a alzarse co título, as francesas do Paris Gaels.

Logo do campionato no Paneuropeo de 2019 a competición parou durante dous anos pola pandemia de COVID-19. A competición continental regresou en 2022, cando A Coruña organizou o campionato, do que se acabaron proclamando campioas as xogadoras do Belgium GAA ‘B'.

En 2024 o equipo coruñés trasladouse a Lión para disputar unha nova edición do Campionato Paneuropeo que se celebrou na cidade francesa o 19 de outubro e que supuxo a súa sexta participación na competición continental. As Fillas conseguiron o seu segundo título continental na categoría "Intermediate" logo de clasificarse como segundas de grupo logo de impoñerse ao Brest (17-4) e ao Clermont (11-4), e perder co Nantes (10-13). Nas semifinais as coruñesas derrotaron ao Copenhague, un equipo que adoitaba disputar as finais, ao que derrotaron por 10-8. No partido decisivo se enfrontaron novamente ao Nantes, que se proclamara campión en varias edicións anteriores, ao que se impuxeron por igualmente por 10-8.

Palmarés

• 3 Ligas Galegas: 2016, 2017, 2018
• 3 Campionatos Ibéricos: 2016, 2017, 2018
• 2 Campionatos Paneuropeos: 2019, 2024
• 1 Copa Galega: 2017
• 1 Copa da Asociación: 2016
• 1 All-Galicia: 2023

Véxase tamén

Ligazóns externas

• Sito web oficial dos Fillos de Breogán