Galegos nos Xogos Olímpicos de 2024

A piragüista Teresa Portela disputa os seus sétimos Xogos Olímpicos.

Nos Xogos Olímpicos de 2024 en París participaron 30 deportistas galegos, o que supuxo a representación máis numerosa da historia do olimpismo galego.

Antecedentes

Antes de París, a maior participación de galegos nunhas olimpíadas dérase en Toquio 2020, cun total de 21 deportistas. Anteriormente a maior marca compartíana os Barcelona 92 e Sydney 2000, con 17 deportistas en ambas as convocatorias. En Toquio 2020 conseguíronse tamén os mellores resultados do olimpismo galego, cunha colleita de seis medallas (superando as catro de Londres 2012) e nove diplomas olímpicos.

Lista de participantes

A seguinte táboa amosa a lista dos deportistas galegos que participaron nas diversas probas da cita olímpica de París:

Deporte	Deportista	Proba	Resultado
Atletismo	Yulenmis Aguilar	Lanzamento de xavelina	6ª (diploma)
	Adrián Ben	800 metros	28º
	Ester Navarrete	Maratón feminino	42ª
	Tariku Novales	Maratón masculino	68º
	Ana Peleteiro	Triplo salto feminino	6ª (diploma)
	Belén Toimil	Lanzamento de peso	25ª
Baloncesto	María Araújo	Torneo feminino	5º (diploma)
	Paula Ginzo
Balonmán	Rodrigo Corrales	Torneo masculino	Bronce
	Pedro Rodríguez		10º
	Alicia Fernández	Torneo feminino	1ª fase
Boxeo	Enmanuel Reyes	-91 kg (pesos pesados)	Bronce
Fútbol	Teresa Abelleira	Torneo feminino	4ª (diploma)
Judo	David García	-66 kg (pesos semilixeiros)	1ª rolda
	Fran Garrigós	-60 kg (pesos superlixeiros)	Bronce
	Laura Martínez	-48 kg (pesos superlixeiros)	Semifinais
	Nikoloz Sherazadishvili	-100 kg (pesos semipesados)	5º (diploma)
Monopatinaxe	Julia Benedetti	Parque	17ª
Piragüismo	Carlos Arévalo	K-2 500 m masculino	9º
		K-4 500 m masculino	Bronce
	Antía Jácome	C-1 200 m feminino	4ª (diploma)
		C-2 500 m feminino	6ª (diploma)
	Pablo Crespo	C-1 1000 m masculino	12º
	Diego Domínguez	C-2 500 m masculino	Bronce
	Carolina García	K-4 500 m feminino	6ª (diploma)
		K-2 500 m feminino	16ª
	Rodrigo Germade	K-4 500 m masculino	Bronce
		K-2 500 m masculino	9º
	Manuel Ochoa	Caiac cross	14º
	Teresa Portela	K-4 500 m feminino	6ª (diploma)
Remo	Rodrigo Conde	Dobre scull	5º (diploma)
	Caetano Horta	Dobre scull lixeiro	8º (diploma)
Tríatlon	Antonio Serrat	Proba masculina	32º
		Remudas mixtas	9º
Vela	Támara Echegoyen	49er FX	12ª

Actuación dos deportistas

Atletismo

Yulenmis Aguilar

A lanzadora de xavelina Yulenmis Aguilar, nacida en Cuba e dende 2020 residente na Coruña, participou nos seus segundos Xogos Olímpicos, despois de ter participado en Río 2016, representando naquel momento ao país insular. Xa en París, cun lanzamento de 61,95 metros logrou o pase á final e nesta obtivo a sexta praza e un diploma olímpico, grazas a un lanzamento de 62,78 m.

Adrián Ben

O viveirense Adrián Ben participou na proba dos 800 metros, pero non puido repetir o éxito dos Xogos de Toquio. Na súa serie, na que só se clasificaban para as semifinais os tres primeiros, acabou cuarto, a unha décima do terceiro, o sueco Andreas Kramer. Foi así para a repesca, onde de novo rematou ás portas das semifinais.

Ester Navarrete

A viguesa Ester Navarrete disputou en París o segundo maratón da súa carreira, despois de conseguir a vitoria no campionato de España uns meses antes. Xa na capital francesa, conseguiu rematar a proba na 42ª posición, tras unha carreira con condicións extremas na que chegou a vomitar.

Tariku Novales

O noiés Tariku Novales acudiu aos Xogos de París co récord de España de maratón conseguido uns meses antes en Valencia. Con todo, só puido ser 68º na capital francesa, cun duro percorrido con empinadas costas que completou en 2h25'50'', a máis de 19 minutos do vencedor, o etíope Tamirat Tola.

Ana Peleteiro

A ribeirense Ana Peleteiro chegaba aos Xogos de París con altas expectativas, despois do bronce logrado en Toquio, os bos resultados recentes e ante a ausencia da venezolana Yulimar Rojas. Iniciou a competición o 2 de agosto, conseguindo o pase á final no seu primeiro salto (14,36 metros). Ao día seguinte disputou a final, que tivo que verse interrompida pola choiva que caía no Stade de France. Realizou un mellor salto de 14,59 m., insuficiente para achegarse ás medallas, acabando finalmente sexta. Máis tarde afirmou que a choiva a afectara psicoloxicamente durante a competición.

Belén Toimil

A mugardesa Belén Toimil participou no lanzamento de peso, sen conseguir pasar á final. Realizou dous lanzamentos nulos e un terceiro de 16,83 metros, lonxe das súas mellores marcas e tamén do mínimo para meterse na final.

Baloncesto

María Araújo e Paula Ginzo

As xogadoras de baloncesto María Araújo e Paula Ginzo debutaron nos Xogos cunha vitoria sobre a China na prórroga. Dúas vitorias nos dous seguintes partidos colocaron á selección española como líder do Grupo A, pero o equipo adestrado polo tamén galego Miguel Méndez caeu nos cuartos de final contra Bélxica por 66-79.

Balonmán

Rodrigo Corrales

O cangués Rodrigo Corrales repetiu o mesmo resultado de Toquio 2020 e regresou a Galicia coa súa segunda medalla de bronce. A selección española de balonmán conseguiu o pase á fase eliminatoria como terceira do seu grupo e nos cuartos de final eliminou a Exipto. Xa en semifinais caeu ante Alemaña e no partido polo terceiro posto conseguiu vencer a Eslovenia. Rodrigo Corrales alternou na portería con Gonzalo Pérez de Vargas e deste xeito converteuse no quinto deportista galego en sumar máis dunha medalla olímpica, despois de Ramos Misioné, David Cal, Rodrigo Germade e Carlos Arévalo.

Alicia Fernández

Alicia Fernández participou en París nos seus segundos Xogos coa selección española de balonmán. Non disputou os dous primeiros partidos por molestias físicas, pero recuperouse para os encontros ante os Países Baixos, Hungría e Francia. O equipo completou unha pésima fase de grupos, incapaz de sumar nin un só punto, e quedou eliminado na fase de grupos.

Pedro Rodríguez

O vigués Pedro Rodríguez, nacionalizado húngaro, participou nos Xogos coa selección maxiar de balonmán. Debutou na terceira xornada ante Noruega e disputou un total de tres encontros, anotando dous goles contra Dinamarca. Con todo, o equipo non conseguiu pasar da primeira fase, rematando a súa participación na décima praza.

Boxeo

Enmanuel Reyes

O boxeador Enmanuel Reyes derrotou no seu primeiro combate ao chinés Han Xuezhen e nos cuartos de final ao belga Victor Schelstraete, asegurando así o pase ás semifinais e consecuentemente unha medalla olímpica. Nas semifinais enfrontouse ao acerbaixano Loren Alfonso, tamén de orixe cubana, perdendo por unha polémica decisión dos xuíces. O seu bronce foi a primeira medalla olímpica para o boxeo español en 24 anos, dende a prata de Rafa Lozano en Sydney 2000.

Fútbol

Teresa Abelleira

A futbolista pontevedresa Teresa Abelleira foi unha das 22 mulleres seleccionadas por Montse Tomé para a primeira participación da selección española feminina nuns Xogos Olímpicos. Disputou os seis partidos do combinado español no torneo, sendo titular en catro deles. O equipo acadou as semifinais, onde caeu ante o Brasil por 4-2, e perdeu tamén no encontro pola medalla de bronce contra Alemaña (1-0).

Judo

David García

O tarraconense David García, judoka baixo licenza galega, participou na proba de menos de 66 kg, caendo na primeira rolda ante o casaco Ğusman Kirğizbaev.

Fran Garrigós

O judoka nacido en Móstoles Fran Garrigós, empadroado en Sanxenxo e que compite con licenza galega como os seus compañeiros da AD Famu de Vigo David García e Laura Martínez, participou na categoría de –60 kg. Derrotou ao belga Jorre Verstraeten e ao xaponés Ryuju Nagayama, acadando así as semifinais, nas que caeu fronte ao casaco Eldos Smetov. No combate polo bronce venceu ao xeorxiano Giorgi Sardalashvili, converténdose así no primeiro medallista español nos Xogos de París.

Laura Martínez

Laura Martínez, judoka membro tamén da AD Famu de Vigo e baixo licenza galega, competiu na categoría de menos de 48 kg. Eliminou sucesivamente á chilena Mary Dee Vargas, á serbia Milica Nikolić e á casaca Äbïba Äbwjaqinova, acadando así as semifinais, nas que caeu fronte á mongol Bavuudorjiin Baasankhüü. Volveu perder no combate polo bronce, sendo a medalla para a francesa Shirine Boukli.

Nikoloz Sherazadishvili

O judoka vigués de orixe xeorxiana Nikoloz Sherazadishvili disputou os seus segundos Xogos, desta vez na categoría de 100 kg (en Toquio participara en menos de 90 kg), obtendo idéntico resultado. Eliminou ao húngaro Zsombor Vég antes de caer nos cuartos de final diante do suízo Daniel Eich. Accedeu así á repesca, onde derrotou primeiramente ao xaponés Aaron Wolf, pero acabou quedando de novo ás portas do bronce ao caer fronte ao uzbeco Muzaffarbek Turoboyev por ippon.

Monopatinaxe

Julia Benedetti

A coruñesa Julia Benedetti disputou os seus segundos Xogos Olímpicos aos seus 19 anos, de novo na modalidade de parque. Cometeu dous erros nas dúas primeiras mangas e acabou eliminada na primeira fase, ocupando a 17ª posición con 70,27 puntos.

Piragüismo

Carlos Arévalo e Rodrigo Germade

Os piragüista Carlos Arévalo e Rodrigo Germade disputaron os seus segundos Xogos xuntos (os terceiros no caso de Germade) e gañaron a súa segunda medalla no K-4 500 metros, desta vez de bronce. Formando equipo de novo con Saúl Craviotto, e coa novidade de Marcus Cooper, metéronse sen problemas na final, onde remataron por detrás do equipo alemán e do australiano.

Disputaron tamén a modalidade do K-2 500 metros, pero neste caso non conseguiron o pase á final, ao rematar quintos na súa tirada de semifinais. Accederon á final de consolación, onde conseguiron a vitoria e con ela o noveno posto final.

Pablo Crespo

O padexeiro Pablo Crespo debutou en París como olímpico, seguindo os pasos de seus pais: José Manuel Crespo e Ana María Penas. Fíxoo na modalidade do C-1 1000 metros, conseguindo o pase a semifinais, pero non á final principal. Disputou a final B, na que rematou cuarto, o que se traduciu no 12º posto final.

Diego Domínguez

O piragüista madrileño fincado en Pontevedra Diego Domínguez participou na proba de C-2 500 metros xunto ao catalán Joan Antoni Moreno. Conseguiron o segundo posto da súa serie e con ela o pase directo ás semifinais, e nestas a cuarta posición da súa manga, o que lles deu acceso á final. Xa na tirada final, conseguiron a medalla de bronce ao cruzaren a meta na terceira posición, só por detrás das embarcacións dos chineses Liu Hao e Ji Bowen e dos italianos Gabriele Casadei e Carlo Tacchini.

Carolina García

A piragüista pontevedresa Carolina García participou en dúas modalidades, K-4 e K-2, ambas sobre a distancia de 500 metros. Na primeira delas competiu formando equipo xunto a Sara Ouzande, Estefanía Fernández e a histórica Teresa Portela, conseguindo o pase á final ao primeiro intento. Xa na final só puideron ser sextas, a menos de dous segundos da piragua neozelandesa, medalla de ouro.

Menos fortuna tivo no K-2, no que participou xunto a Sara Ouzande. Lograron o pase ás semifinais, pero non á final, ao rematar sextas na súa serie. Na final de consolación non conseguiron cruzar a meta, ao envorcar o seu caiac nos metros finais.

Antía Jácome

A padexeira pontevedresa Antía Jácome participou en dúas modalidades: C-1 200 metros e C-2 500 metros, nesta última xunto a María Corbera. Disputou primeiro o C-2, conseguindo sen problemas o pase á final. Nesta remataron na sexta posición, a máis de tres segundos das chinesas Xu Shixiao e Sun Mengya. No C-1 200 meteuse tamén na final, despois de ser segunda da súa serie na rolda inicial e terceira nas semifinais. Xa na tirada final cruzou a meta na cuarta posición, nun apertado final con seis deportistas en menos dun segundo.

Manuel Ochoa

O tomiñés Manuel Ochoa debutou no estadio náutico de Vaires-sur-Marne con boas sensacións, logrando o décimo mellor tempo de entre 38 participantes na carreira contra o reloxo e superando a continuación a fase preliminar como o mellor da súa manga. Nos cuartos de final conseguiu tamén o mellor tempo da súa serie, pero sufriu unha penalización por saltar a derradeira porta, polo que foi descualificado, rematando así a súa primeira participación olímpica.

Teresa Portela

A canguesa Teresa Portela disputou en París os seus sétimos Xogos Olímpicos. Participou na proba de K-4 500 metros, formando equipo xunto a Sara Ouzande, Estefanía Fernández e a tamén galega Carolina García, conseguindo o pase á final ao primeiro intento. Xa na final só puideron ser sextas, a menos de dous segundos da piragua neozelandesa, medalla de ouro.

Remo

Rodrigo Conde

Despois de renunciar aos Xogos Olímpicos de 2020, o remeiro moañés Rodrigo Conde acudiu a París formando parella no dobre scull co catalán Aleix García, estando entre os favoritos para as medallas. Tras meterse sen problemas nas semifinais, clasificáronse para a final como segundos da súa serie. Iniciaron con bo ritmo a final, pero foron perdendo posicións co paso dos metros, acabando final na quinta posición, o mellor resultado da historia dun barco español no dobre scull olímpico.

Caetano Horta

O remeiro noiés Caetano Horta disputou en París os seus segundos Xogos, desta vez facendo parella no dobre scull lixeiro xunto ao catalán Dennis Carrecedo. Rematou a súa quenda na segunda posición, logrando así o acceso directo ás semifinais. Con todo, non conseguiu meterse na final, ao rematar a súa serie na cuarta posición de seis embarcacións. Accedeu á final B, onde quedou segundo, o que supuxo a oitava posición final e o segundo diploma olímpico da súa carreira.

Tríatlon

Antonio Serrat

O vigués Antonio Serrat converteuse no terceiro triatleta galego en participar nuns Xogos Olímpicos, despois de Iván Raña, Xavier Gómez Noya e Pilar Hidalgo. Tralo adiamento da proba masculina de tríatlon pola mala calidade da auga do río Sena, esta disputouse finalmente o 31 de xullo. A mala actuación de Serrat no sector de natación lastrou o resto da súa proba, e aínda que remontou posicións na bicicleta e na carreira a pé, só puido chegar á meta na 32ª posición, a máis de cinco minutos do vencedor, o británico Alex Yee.

Seis días despois disputou tamén a proba de remudas mixtas, xunto a Alberto González, Anna Godoy e Míriam Casillas. O equipo rematou noveno despois de dúas penalizacións.

Vela

Támara Echegoyen

Nos seus cuartos Xogos Olímpicos, a ourensá Támara Echegoyen, abandeirada da delegación española, non puido repetir os bos resultados das súas tres participacións anteriores. Competiu na clase 49er FX xunto á catalá Paula Barceló, pero remataron a gran maioría das regatas na metade inferior da táboa, concluíndo no 12º posto na clasificación final. Con todo, despediuse dos Xogos cunha vitoria na última regata.

Véxase tamén

Outros artigos

• Lista de medallistas olímpicos galegos
• Galegos nos Xogos Olímpicos de 2012
• Galegos nos Xogos Olímpicos de 2016
• Galegos nos Xogos Olímpicos de 2020

Ligazóns externas

• Galicia Olímpica, sitio web creado pola Xunta de Galicia e dedicado aos deportistas olímpicos galegos.