Amancio Ortega

Amancio Ortega

Biografía
Nacemento	(es) Amancio Ortega Gaona 28 de marzo de 1936 (88 anos) Busdongo de Arbas, España
Residencia	A Coruña
Actividade
Ocupación	emprendedor, empresario, filántropo
Patrimonio estimado	77.000 M$ (2021)
Familia
Cónxuxe	Flora Pérez (2001–) Rosalía Mera (1966–1986), divorcio
Fillos	Sandra Ortega Mera  () Rosalía Mera Marcos Ortega Mera  () Rosalía Mera Marta Ortega  () Flora Pérez
Premios
(2009)  Gran Cruz da Orde do Mérito Civil (2001)  Medalla de Ouro ó Merito no Traballo (1992)  Medalla Castelao
Sinatura
Páxina web	faortega.org

Amancio Ortega Gaona, nado en Busdongo de Arbas, municipio de Villamanín (León) o 28 de marzo de 1936, é un empresario galego da moda, creador de Zara. Como presidente de Inditex, é a persoa máis rica de Galiza e España, a 2ª de Europa e a 7ª do mundo segundo a revista Forbes en 2011, cunha fortuna calculada de 31.000 millóns de dólares. En 2017, calculouse a súa fortuna en 72 700 millóns de dólares, e levaba varios anos entre os cinco homes máis ricos do mundo. En xaneiro de 2011 anunciou que en xullo dese ano deixaría a presidencia do grupo téxtil, onde sería relevado por Pablo Isla.

Traxectoria

Actividade profesional

Gala, fábrica de camisas.

Primeira tenda de Zara na rúa Juan Flórez da Coruña.

Amancio Ortega Gaona, fillo de pais de orixe valisoletana, naceu en Busdongo de Arbas, unha aldea leonesa do concello de Villamanín. Amancio é o segundo de catro irmáns, dous homes e dúas mulleres: o maior, Antonio, faleceu en 1987; Josefina (Pepita) é a menor e Pilar falecida en 2000, que nunca formou parte do negocio téxtil da familia. Aos tres meses marchou con eles a Tolosa, onde viviu ata 1944. Nesa altura destinaron a seu pai, xefe de estación de ferrocarril, á Coruña, onde marchou, e onde con catorce anos comezou a súa carreira no mundo do téxtil como empregado de dúas coñecidas tendas de roupa: a camisería Gala onde traballa tres anos e a mercería La Maja a onde vai traballar cos seus irmáns con dezasete anos.

É en 1963 cando crea coa axuda dos seus irmáns a compañía Confecciones GOA (as súas iniciais en sentido inverso), dedicada á fabricación de batas. O negocio crece progresivamente nesta década, e coa súa muller daquela, Rosalía Mera, funda Zara como empresa. En 1975 ábrese a primeira tenda de Zara na céntrica rúa de Juan Flórez, na Coruña. Os seus establecementos comezan a abrirse por toda España e o mundo. Co aumento do volume de actividades da empresa, en 1985 créase o grupo Inditex, para acoller as distintas empresas da confección e a distribución que posúe.

Ademais do negocio téxtil, Ortega diversificou a súa iniciativa empresarial cara a outros sectores industriais como o inmobiliario, o financeiro, os concesionarios de automóbiles ou a xestión de fondos de investimento.

Vida persoal

Escola infantil de Esteiro, Ferrol. Fundación Amancio Ortega.

Refuxiado na normalidade e obsesionado polo anonimato, toda a súa vida e ata o seu rostro foron durante moitos anos un dos segredos mellor gardados. Nunca concedeu unha entrevista, aínda que si ten colaborado nalgún libro biográfico. Entre as súas afeccións coñecidas destacan a hípica, os automóbiles e a pintura.

Marcos, o único fillo home de Ortega, naceu cunha grave discapacidade e o empresario e mais a muller daquela, Rosalía Mera, promoveron a creación da Fundación Paideia, unha institución de integración de discapacitados. Separouse en 1986 e despois casou con Flora Pérez Marcote, con quen tivo unha filla, Marta Ortega, quen se perfila como sucesora á fronte do grupo empresarial e no que xa ten ocupado diversos postos como en Bershka.

En 2001 crea a Fundación Amancio Ortega, institución privada sen fin de lucro que promove actividades no campo da cultura, a investigación, a educación e a ciencia.

É propietario do pazo de Anceis en Anceis, e o impulsor das instalacións hípicas de Casas Novas, en Larín.

No ano 2012 Amancio Ortega, a través da fundación que leva o seu nome, realizou unha doazón a Cáritas por valor de 20 millóns de euros, que nese momento se calculou que supoñía o 0,05% do seu patrimonio. En 2017 doou 300 millóns de euros para equipamento contra o cancro.

Honras

• Medalla Castelao, 1992
• Cruz de la Orden del Mérito Civil, 2009

Véxase tamén

Bibliografía

• Badía, Enrique (2008). Zara...y sus hermanas. Col. Historia Empresarial. Madrid: LID Editorial Empresarial, S.L. ISBN 978-8483560266. 
• Blanco, Xabier; Salgado, Jesús (2004). Amancio Ortega, de cero a Zara: El primer libro de investigación sobre el imperio Inditex. Madrid: Esfera de los Libros. ISBN 978-84-9734-167-7. 
• Martín, David (2012). Zara, visión y estrategia de Amancio Ortega. Conecta. ISBN 978-8415431367. 

Ligazóns externas

• Páxina web da Fundación Amancio Ortega (en castelán) e (en inglés)