Rosalía Mera

Rosalía Mera

Biografía
Nacemento	28 de xaneiro de 1944 A Coruña, España
Morte	15 de agosto de 2013 (69 anos) A Coruña, España
Causa da morte	hemorraxia cerebral
Lugar de sepultura	Liáns
Actividade
Ocupación	emprendedora, empresaria, filántropa
Familia
Cónxuxe	Amancio Ortega (1966–1986; divorciada)
Fillos	Sandra Ortega Mera, Marcos Ortega Mera
Premios
(2004)  Medalla Castelao
Sitio web	paideia.es

Rosalía Mera Goyenechea, nada na Coruña o 28 de xaneiro de 1944 e finada na mesma cidade o 15 de agosto de 2013, foi unha empresaria galega. Foi co fundadora de Inditex xunto con Amancio Ortega.

Traxectoria

Fundación Paideia na praza de María Pita, A Coruña.

IES Rosalía Mera, na Coruña

Tivo que deixar a escola con 11 anos para traballar nunha pequena empresa téxtil La Maja de costureira onde coñeceu a Amancio Ortega co que casaría e tería dous fillos, Sandra e Marcos. Fundaron GOA, esta empresa coruñesa foi medrando ata converterse en Zara e finalmente en Inditex. Logo do seu divorcio en 1986, Rosalía Mera conservou o 7% das participacións no grupo. En 1986 comezou os estudos de Maxisterio onde se Diplomou. En 2004 abandonou o consello de administración de Inditex, mantendo a súa participación logo da cotización en bolsa.

Despois da separación comezou unha carreira de investimentos en diferentes proxectos e corporacións de ámbitos tan diversos como a construción, inmobiliarias, unha compañía de recoñecemento de neonatos polas pegadas dactilares, o audiovisual ou a biotecnoloxía. Neste último campo foi membro do consello de administración de Pharma Mar, do grupo galego Zeltia. No audiovisual posuíu parte do capital de Continental Producciones, Milou Films ou Tornasol Films, e desenvolveu un centro de iniciativas empresariais denominado Mans, e centrado no sector audiovisual. Ademais, en 2007 entrou no sector da enerxía solar creando quince firmas de explotación de parques fotovoltaicos

A súa xestión económica realizábaa a través de sociedades de investimento como Rosp Corunna, Breixo Inversiones, Soandres de Activos ou Ferrado Inmuebles. A revista estadounidense Forbes situouna como a 76ª muller máis influente do mundo en 2007, así como a 264ª persoa máis rica do mundo, cun capital estimado de 2.490 millóns de euros Segundo esa mesma fonte, en 2007 sería a terceira persoa máis rica de Galicia, despois de Amancio Ortega e de Manuel Jove. A revista calculoulle en 2008 unha riqueza persoal de 1.964 millóns de euros (368ª do mundo).

Ademais, foi a fundadora (1986) e presidenta da Fundación Paideia Galiza, unha ONG que traballa a prol da incorporación das persoas discapacitadas ao mercado laboral.

O 14 de agosto de 2013, estando de vacacións en Menorca, sufriu un accidente cerebrovascular. Faleceu o día seguinte no Hopital San Rafael da Coruña a onde fora trasladada en avión dende Menorca. Foi enterrada no cemiterio da igrexa de Santaia de Liáns, en Oleiros (A Coruña).

Trala morte, a participación do 7% en Inditex foi herdada pola súa filla Sandra Ortega.

Véxase tamén

Bibliografía

• Blanco, Xabier R. (2015). Rosalía Mera, el hilo suelto (en castelán). Madrid: La Esfera de los Libros. ISBN 9788490602782.