Bandeira de Kosovo

Bandeira de Kosovo
Características
Uso	...
Proporción	5:7 (1:1.4 na lei)
Adopción	17 de febreiro de 2008
Cores	Azul     Dourado     Branco

A bandeira de Kosovo foi adoptada polos organismos transitorios de goberno de devandito territorio xunto coa declaración de independencia unilateral, proclamada o 17 de febreiro do ano 2008.

A bandeira está composta por un fondo azul sobre o cal atópase un mapa de Kosovo en cor amarela e seis estrelas brancas que simbolizan aos seis grupos étnicos que poboan a rexión: os albaneses de Kosovo, os serbios, os turcos, os goranis, os xitanos e os bosníacos. Este deseño creouse imitando as características tanto da bandeira da Unión Europea como das bandeiras de Bosnia-Hercegovina e Chipre, creadas co propósito de conciliación entre diversos grupos étnicos.

Previamente, a rexión empregaba a bandeira das Nacións Unidas dende a creación da UNMIK en 1999 como unha forma de manter un consenso entre as etnias serbia e albanesas, en constante conflito político e territorial na rexión. A bandeira de Serbia (e dos seus estados predecesores) non era utilizada a pesar de ser a bandeira de iure do territorio, sendo unicamente izada polas minorías étnicas de orixe serbia; pola contra, a bandeira de Albania é o símbolo máis empregado polos habitantes do país, na súa maioría de etnia albanesa.

Historia

A bandeira de Albania foi historicamente vencellada ao pobo albanokosovar, que conforma preto do 90% da poboación total de Kosovo

Kosovo nunca nomeou unha bandeira de seu ata o ano 2008, cando declarou a súa independencia de Serbia. Previamente, empregara as bandeiras dos diversos países que dominaron a rexión, destacando principalmente a bandeira de Iugoslavia, que foi empregada ata a desintegración do país en 1992.

Tras este feito, Kosovo pasou a formar legalmente parte da República Federal de Iugoslavia (ao ser parte do territorio do estado de Serbia). Con todo, en 1991 foi proclamada a independencia do país por Ibrahim Rugova, a cal non foi recoñecida pola comunidade internacional. Esta república empregou oficialmente a bandeira de Albania como o seu emblema nacional ao ser o símbolo máis utilizado pola comunidade albanokosovar.

En 1999, a República Federal de Iugoslavia e a OTAN enfrontáronse na chamada Guerra de Kósovo, trala cal estableceuse unha misión de paz a cargo da Organización das Nacións Unidas. A denominada UNMIK quedou a cargo da administración do territorio de Kosovo, a pesar de que este permanecía legalmente como territorio serbio. Así, a bandeira das Nacións Unidas converteuse no emblema legal de Kosovo, pero a poboación seguiu empregando as bandeiras dos respectivos países de orixe das súas etnias.

O goberno provisional existente, a cargo de políticos de orixe albanesa e liderado por Ibrahim Rugova, deseñou un emblema para o cargo de presidente de Kosovo. Esta bandeira incluía un fondo azul sobre o cal atopábase un selo que incorporaba a aguia bicéfala da bandeira albanesa sobre campo vermello, un escudo no seu peito e un lazo co nome "Dardania", un antigo nome dado á rexión de Kosovo. Este estandarte foi moitas veces utilizado como bandeira de Kosovo co fin de diferencialo da bandeira albanesa e dar un signo de independencia do territorio (tanto de Albania como de Serbia).

• 
  Bandeira da minoría étnica albanesa na antiga Iugoslavia socialista.
• 
  A bandeira de Albania foi empregada por Kosovo durante a súa independencia non recoñecida entre 1991 e 2000.
• 
  A bandeira das Naciones Unidas foi empregada dende o establecemento da UNMIK.
• 
  A bandeira de Serbia, bandeira de iure de Kosovo ata 2008.

A busca dunha bandeira

Estandarte presidencial deseñado por Ibrahim Rugova, ás veces empregado como emblema kosovar.

Atendendo a posibilidade de requirir unha nova bandeira, en xuño do 2007, realizouse unha competición, dando como resultado 993 entradas para a posible nova bandeira. Baixo os termos das negociacións da ONU, todos os símbolos terían que reflectir a natureza multiétnica de Kósovo, polo que se prohibiu a presenza da aguia bicéfala albanesa ou serbia, o emprego dos esquemas de cores nos que soamente se atopaban vermellos e negros ou vermellos, azuis e brancos. Ademais, todas as bandeiras debían ser rectangulares e ter unha proporción de 2:3. De todos os deseños participantes un total de 700 lograron satisfacer aos xuízos. Un grupo de políticos de Kosovo e expertos coñecidos coma o “Unity Team” seleccionou tres deseños, os cales foron votados pola Asemblea de Kosovo. Das tres propostas, foi elixida a primeira, aínda que foron modificadas algunhas características.

• 
  Primeira proposta
• 
  Segunda proposta
• 
  Terceira proposta

Véxase tamén

Ligazóns externas

• Kosovo en Flags of the World (en inglés)