Bandeira de Xeorxia

Bandeira de Xeorxia
Características
Uso	...
Proporción	2:3
Adopción	25 de xuño de 2004
Cores	Branco     Vermello

A bandeira de Xeorxia (en xeorxiano: საქართველოს სახელმწიფო დროშა, saqartvelos saxelmtsipho drosha), coñecida como a "bandeira das cinco cruces", é un dos símbolos oficiais do país dende o 14 de xaneiro de 2004 tras cincocentos anos en desuso. Foi o emblema do Reino de Xeorxia durante a Idade Media. É unha bandeira de cor branca cunha cruz vermella na súa parte central que a divide en cuadrantes e con catro pequenas cruces vermellas por cada cuadrante. As proporcións entre o ancho e o alto da bandeira son de 2:3.

Deseño

A bandeira nacional de Xeorxia, tal como vén descrita no Decreto Presidnecial nº 31 do 25 de xaneiro de 2004:

A bandeira nacional de Xeorxia é un rectángulo branco, cunha gran cruz vermella ma súa parte central tocando os catro cantos da bandeira. Nas catro esquinas hai catro cruces bolnur-katskhuri da mesma cor (como a gran cruz).

Esquema	Vermello	Branco
RGB	255-0-0	255-255-255
CMYK	0-100-100-0	0-0-0-0
Web	#FF0000	#FFFFFF

Historia

A existencia da "bandeira das cinco cruces" está documentada dende o século XIII. O elemento central da bandeira é a Cruz de San Xurxo que é considerado patrón de Xeorxia e tamén figura na bandeira de Inglaterra. Segundo o erudito xeorxiano Giorgi Gabeskiria, probablemente as catro cruces pequenas da bandeira remóntanse ao reinado de Xurxo V de Xeorxia (alcumado "o Brillante" ou "o Esplendido") monarca que logrou expulsar aos mongois. Co paso do tempo fóronse introducindo algunhas modificacións como o deseño das pequenas cruces que se converteron nunha variante das que figuran na cruz de Xerusalén, símbolo usado dos cruzados.

A bandeira caeu en desuso durante a Idade Media. Logo da independencia de Xeorxia da Unión Soviética en 1991 foi recuperada polo nacionalismo xeorxiano. Oito anos máis tarde unha maioría de xeorxianos, incluíndo o patriarca da Igrexa ortodoxa de Xeorxia, apoiaron a restauración do antigo emblema do Reino de Xeorxia e no parlamento o proxecto de lei para modificar a bandeira superou tódolos trámites aínda que non chegou a entrar en vigor pola negativa do presidente Eduard Shevardnadze a sancionar a norma. Logo da negativa do presidente a recuperar "A bandeira das cinco cruces" esta foi adoptada como símbolo do principal partido da oposición, o Movemento de Unidade Nacional, liderado por Mikhail Saakashvili e o seu uso representou o rexeitamento a Shevardnadze.

A "bandeira das cinco cruces" foi declarada símbolo nacional o 14 de xaneiro de 2004 e foi aprobada formalmente a través dun decreto presidencial promulgado por Saakashvili o 25 de xaneiro, tras a súa elección como presidente de Xeorxia. A adopción da bandeira dun partido político como emblema nacional non estivo exento de controversia xa que non faltaron voces que cuestionaron o carácter democrático desta decisión.

Bandeiras históricas

Xeorxia (1918-1921, 1990-2004)

Durante a existencia de Xeorxia como estado independente dende 1918 ata 1921, empregouse a bandeira tricolor. Era unha bandeira de cor vermella burel (vermello óxido) con dúas franxas de cor negra (a superior) e branco (a inferior) situadas no cuadrante superior máis achegado ao mastro. O deseño foi obra de Jakob Nikoladze, un pintor que resultou elixido nun concurso convocado para o efecto. Esta bandeira foi abolida pola Unión Soviética en 1921. Obtida de novo a independencia, foi recuperada polo Consello Supremo da República de Xeorxia como símbolo nacional o 14 de novembro de 1990 pero foi perdendo popularidade entre a poboación ao quedar vencellada coa caótica situación política e social na que quedou inmersa Xeorxia logo da súa independencia da Unión Soviética.

República Socialista de Xeorxia (1921-1990)

Durante o período no que Xeorxia formou parte da Unión Soviética, adoptáronse, como emblema, varias versións da bandeira da Unión Soviética nas que se aprecia incorporada a súa denominación oficial República Socialista soviética. A última versión foi unha bandeira vermella cunha franxa horizontal azul próxima ao bordo superior da bandeira cunha figura de sol azul situada no cuadrante superior máis próximo ao mastro. No interior do sol azul figuraban unha fouce, un martelo e unha estrela vermellos. Esta bandeira foi adoptada en 1951 e estivo vixente ata a independencia do país en novembro de 1990.

• 
  Xeorxia
  (1918-1921)
• 
  RSS de Xeorxia
  (1921-1937)
• 
  RSS de Xeorxia
  (1937-1951)
• 
  RSS de Xeorxia
  (1951-1990)
• 
  Xeorxia
  (1990-2004)

Outras bandeiras

• 
  Forzas armadas.
• 
  Exército de Terra
• 
  Armada e Pavillón de Proa.
• 
  Exército do Aire
• 
  Garda Nacional
• 
  Estandarte presidencial

Véxase tamén

Ligazóns externas

• Xeorxia en Flags of the World (en inglés)